Kan tei a herh ngai mi hakkauhnak


Phungthlukbia 15:27, A hak a kaumi nih a innchungkhar cungah harnak a tlunter,

Mahatma Gandhi nih the earth can provide your need, not your greed a rak ti i, vawlei nih hin na herh mi cu an pek kho ko nain, na hakkauhnak tu cu an pe kho lo, a ti. Hitler nih vawlei pumpi hi tei dih, uk dih le a kuttang ah chiah dih a rak duh. Cucaah, Hitler bantuk minung pahnih pathum um hna seh law, vawlei pi nih a daih ti hna lo. Kan hakkauhnak cu vawlei nih an kan pe kho ti lo.

Philippines ram i mirum pahra hna lak ah aa tel ve mi Zobel de Ayala cu fanu le fapa a ngeih hna. An rum ngai caah, ka fanu le ka fapa nih hin midang tthi hna sehlaw, kan ngeih mi pawl hi mi dang nih an i hrawm ve lai i a donghnak ah cun a chuh zong an kan chuh dih sual lai, ti kha an phan caah, a fanu a fapa bak cu a tthitumh ter hna. Cu unau pahnih hna nih fa an ngeih mi hna cu hawi an lo lo, an thluak zong a hman lo, tiah ka hoi nu nih a ka chim. Hi nih hin khua a ka ruah ter ngaingai. Vawleicung thil le ri ruangah hin unau, tta far ayin bak an si ko mi an ni um bak ko! An fa le zong cu hawi an lo lo, an thluak hna a hman lo tikah hmailei ah an sipuazi a tthi hruai kho tu ding an si hlei ti lo i an ro vial te vuih tak awk zong an i tlak hlei lo. Cucaah, Phungthlukbia 15:27 chung i a kan cawnpiak mi, A hak a kaumi nih a innchungkhar cungah harnak a tlunter, ti mi hi ruat than tuah uh sih. Hakkauhnak nih lungretheihnak le hnangamlonak le mi zawnruahlonak long te a kan pek. Hakkauhnak ngeih cu mah le mah harnak i pek zong a si rih. Cucaah, kan i ralring ngaingai a herh hlei ah, kan tei khawh ding zong a herh ngaingai mi asi. Zeipoh ngeih dih hi nuamhnak le hnangamnak asi hlei lo.

Jesuh nih Luka 12:15 chung ah “Ralring tein um u, hakkauhnak kha i veng u; zeicahtiah mi a nunnak taktak cu, zeitluk hmanh in rum seh law, a thilri hi a si lo,” tiah a ti. Rumnak cu kan thinlung le kan nun chung i kan ngeih mi Khrih tu ah khan a si. Cun, Kolose 3:5 chung ah, hakkauhnak hi siasal biakning phun khat a si a ti tthan. Cucaah hakkauhnak ngeih hi ttih a tung ngaingai mi a si i, siasal biakning phunkhat a si a ti caah, Pathian he aa ral kah mi zong a si. Kan i ralring a herh ngaingai ko!

Paul nih Filipi 4:12 chungah fiang tein a kan cawnpiak rih mi cu, “Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang” ti hi asi.

Hakkauhnak a tei kho mi le ngeih mi cung ah lungsi hnangam tein um kha a tiam mi kan si i Pathian a thangthat kho peng tu kan si nak hnga Pathian nih thluachuah kan pe hram cio ko seh!
Dr. Hniang Uk
read more "Kan tei a herh ngai mi hakkauhnak"

Pakhat hnu pakhat



Deut. 7:22, Bawipa nan Pathian nih hi miphun hna cu nan hmaiah duhsah duhsah in a ṭhawl hna lai……….., hmakhatte ah nan ṭhawl dih hna lai lo.

Bing nih a lem (swei) tuk cang mi hna khi duhsah duhsah tein, tlawm deuh tete in an pek hna i a hnu ah cun zuu te hna kha an pek hna, an thumh deuh lengmang i a donghnak ah cun an i sum (phiat) khawh thai. Voi khat te ah direct in phiat ter cu a ngah lo, an pumsa nih a celh lo i rawknak tu a chuak deuh ti asi. Ka hawipa pakhat cu kuak kaa phiat nakah a ti i khaini tu kha a hmawm, adonghnak ah cun kuak a zuk mi nak in khaini a hmawm mi tu kha a zual deuh ngaingai in a um cang. Cu bantuk phiat dan kha cu a tha hawi lo. Ka hngakchia lio ah ka nu nih ka upa pakhat a rak ti bal mi cu, ziah, camping hna na kai na kai i zuu hi na ding peng rih ko ee, a ti. Ka upa nih a leh mi cu, an kan cawnpiak nak ah pei, rua cu duhsah duhsah tein a hnah a ttil te lai an kan ti cu, kei zong duhsahduhsah in ka hlawnh ve te ko hna lai cuh a ti ve. Asinain, kum sau pi tiang amah kel asi peng ko. Ka upa nih khan a theory cu a rak theih ko nain, a rak tuah lo, a rak zulh lo. Cucaah, Khrihfa kan sinak ah hin Pathian kong theih le chimh khawh ngaingai nak in kan nun ah langhter i nunpi tu kha a biapi deuh mi asi. Kan tuah awk a si mi le kan hrial awk asi mi hna hi a ngaingai ah cun kan theih ko hna, kan tuah duh lo lengmang tu kha asi. Duhsah duhsah tein hloh zong kan i zuam duh lo. Kan hnuzarh ah thinlung rumnak kong kan chim. Cu kan thinlung rumnak cu duhsah duhsah tein kan hloh ding kha asi.

Pathian nih Israel mi hna Kanan ram lei a hruai hna lio ah hin step by step tein a hruai ton hna. An hruai khawh, an uk khawh tawk in a pek lengmang hna. Cu ti a tuah zong cu Pathian kha an bochan khawh deuh nak hnga, zumhnak in an kal khawh deuh nak hnga caah asi ve.

A can ah cun, an pianthar bakah zeipaoh kan hlawnh ter dih hna, love song ngaih tiang hmanh micheu cu kan sianh ti hna lo. Cu tikah hawikom zong an ngei kho ti lo i, hawi sinah an ni tlum ti lo, an biachim mi le an thawngtha chimh mi tiang kha ngaihpiak duh lo nak tiang a chuak cang.

Kan thinlung chung i a um mi, lo vah rih lo mi ram kau pi kha duhsah duhsah tein kan vat thluahmah ding tu asi. Thla na cam deuhdeuh i, Bible na rel deuhdeuh ahcun Pathian duhnak kha na thei chin lengman lai i na vat ding lohma kha na fiang chin lengmang lai. Pathian nih a kan vat ter mi tiang kha vat lengmang ding asi ko. Hakkau tuk zong a tha lo. Kan hak a kau tuk si cun mi he kan i pehtlai nakah a har chinchin sual lai. Cucaah, kan hloh awk, kan vat awk, kan hlawnh awk asi mi kha pakhat hnu pakhat duhsah duhsah tein a thianh khawh lengmang mi le pitling nun lei ah a panh chin lengmang tu kan si nak hnga Pathian nih thluachuah rak kan pe hram ko seh!



Dr. Hniang Uk
read more "Pakhat hnu pakhat"

Galili tili le Rili Thi nih a kan hmuhsak mi



Lam. 20:35 Pek lei ah hin hmuh lei nak in thluachuahnak a um deuh
Nunnak ti mi i a nuamhnak a muru cu Pathian he kan i pehtlaihnak le pakhat le pakhat kan i pehtlaihnak ah hin a um. Minung cu mah long tein um peng hi a celh lo mi kan si. Abik in kan nih laimi hna cu chungkhat cingla rualchan a daw mi, hawikom a daw mi, miphun a daw mi kan si. Pakhat le pakhat zohkhenh a duh mi kan si. Jesuh nih pakhat le pakhat i daw uh, i zohkhenh uh a ti mi hi kan lai nundan teah a rak um ngaingai ve ko. A bu piin um, bia i ruah, i nuam, social hna tuah a duh ngaingai mi kan si. Cucaah, ramdang phanh tikah, kan khua kan ram kan um dan te kha kan ngai tuk ton. Asinain, ramdang kan phanh tikah (abikin Nitlak lei le Europe lei) micheu khat cu an mah pawl umdan (mah te long um, isolation ) nih a kan den hnawh i, keimah tein ka nung kho ko ti mi ruah nak he kan um tikah, khua le ram caah, miphun caah, unau chungkhat hna caah khua ruat ti lo in; thawh le khuan a tam, kanmah tein pei kan tuan, kan rak i zuam ve ko hna cu tiin, i hawikomhnak (chiat/tthat bu) tibantuk in hruai mi ah pehtlaihnak hna, thawh le khuan hna a pe duh lo mi, chawnh le biak a har ngaingai mi kan um sual maw! Hmailei fa le nau chan chinchin ah cun hinak in a har chinchin te men lai dah.
Palestine ram ah hin Galili tili le Rili Thi tiin pahnih a um. An pahnih hi an i dan ngaingai! Galili tili cu ti thiang si, din khawh si, lio khawh asi, Jordan tiva in a luang (tiva a lutnak zong a um i a chuahnak zong a um), nga a tam, minung zong nih an fuh, pongkam ah mi tampi nih khua an sak hnawh.
Rili thi tu cu, a min bang, zeipoah kha a thi! Ti a luh nak long um i a chuah nak um lo. Nga zong an nung kho lo, a al tuk nak ah hin din sual cun paw fak colh, i lio awk zong a ttha lo i tichung pil awk zong a har ngaingai. Zeihmanh zong a nung kho lo i a pongkam zongah Galili tili bantukin mi zong nih an fuh lem lo i, khua an sak hnawh duh lem lo.
Zeidah an i dannak? Galili nih cun a luhnak zong um i a chuahnak zong um. Rili Thi tu cu a luhnak long um i a chuahnak um ti lo. Galili cu a ngah long si lo in a pek than, Rili Thi cu a ngah long ngah i a pe ti hna lo, a mah caah aa chiah dih, amah ca long aa ruat kan ti lai cu. Cutikah mizong nih an fuh duh lo i, hnawn mi ah aa cang.
Christopher Chapman nih,
                                    Ka pek ah ka ngeih
                                    Ka hman ah ka ngah
                                    Kaa chiah ah a lo (a tlau) a rak ti.
Thluachuah kan hmuh mi hna hi mi caah, a herhnak ah, bomhchanhnak ah, i hawikomhnak i hruaitu hna nih thawh khuan ding an ti mi hna ah kan chuahter ve lo asi ahcun Rili Thi ban tuk kan si lai i minih hnawn mi kan si sual lai. Zeitluk a nung kho mi, a rum mi kan va si zongah mi nih hnawn mi, i hawikomhnak bu hna nih ngamh ti lo mi kan si ahcun nun man a ngei lo mi kan si cang. Micheu nih, biakinn ah chuah pi mi long hi Pathian sinah a phan tiah kan ruah ton. Matt. 25:34-40 ah hin fiang tein a chim.
            Cucaah, pek lei ah hin hmuh lei nak in thluachuahnak a um deuh ti mi hi i tlaih hna uh sih law, kan thluachuah cu Galili tili bantuk in luan ter ve hna uh sih.

Dr. Hniang Uk
Manila, Philippines
/////////////////////////////
read more "Galili tili le Rili Thi nih a kan hmuhsak mi"

Khi ka ah



1 Siangpahrang 17:4 “keimah nih langak hna cu khika ah nangmah kha rawl pek awkah nawl ka pek cang hna,” tiah a ti

Pathian nawl ngaih poah ah hin cun kan nun ah khuaruah har thil ton mi tete a um peng ko lai. Zeiruangah Pathian thil tuah mi khuaruah har lianngan sunparnak kan ton/hmu lo tiah cun, a  nawl kan ngaih lo caah si. A nawl kan ngaih lo tikah kan hal mi zong kan ngah lo i, khuaruah har thil zong kan tong ti lo. Cucaah, Isaiah 1:19 chungah Ka bia nan ka ngaih paoh ahcun, ram nih a chuahtermi thil ṭha kha nan ei hna lai a ti.
Elijah nun in cawn awk ngaingai a si mi pakhat cu: Pathian nih Elijah a ei awk hi a um nak ah direct in a pe lo, Pathian nih a kal ter nak hmun khi ka ah ti mi (Kherith tivate) ah a va kal longlong ah ei awk a ngeih ding kha asi. Pathian nih langak kha Elijah a um nak hmun ah rawl a pek ter mi si loin, khi ka ah ti mi Pathian nih aa thuh ter nak hmun, Kherith tivate tu ah khan asi. Pathian nih khi ka ah a ti mi hmun ah cun va kal hlah sehlaw ei awk ngei lo in a thi kho men, cucu Pathian nih ei awk a pek lo mi si lo in, amah tu kha Pathian nih a chim mi, khi ka hmun ah cun a va kal lo tu caah khan a si hnga.
Pathian nih a mifa vial te hi a kan dawt tuk caah kan herh mi a kan pek dih. Cu asiah, zeiruangah kan ngah lo? Pathian nih a biakam aa let than caah maw si hnga? A si lo! Kan mah tu kha a kan fial mi khi ka ah ti mi hmun ah kan va kal lo ca tu ah khan asi deuh. Kan dih lak nih, khi ka ah ti mi hmun kan ngei cio dih hna, cucu Pathian nawl ngaih nak hmun asi i, cu ka hmun ah cun Pathian khuaruah har in aa phuan nak ding hmun cu asi. Khi ka ah ti mi hi kan i fiang ngaingai a hau cang. Tahchunhnak ah, Pathian nih pe uh law, pek nan si ve lai (Luka 6:38) a kan ti. Kan pe hlan lo poah kha cu khi ka ah kan um rih lo tinak si, kan pek long ah khan khi ka hmun ah cun kan um i, cu khi ka ah cun pek kan si ve lai ding mi kha asi. Khi ka ah ti mi cu um nak kel ah um peng kha a si bal lo. Thlarau lei zong ah a san deuh nak ah a kan tinh piak mi khi ka ah ti mi a um peng. 1 Siangpahrang 17:9 ahcun khi ka ah ti mi bia fang hi voi hnih tiang a um.
Pathian nih hin minung kan herh bau mi caah zeipoah a tuah khawh ko. A tuah zong a kan tuah piak ko. Asinain, cu a kan tuah piak mi cu kan co nak hnga ding caah: thim awk, tuah awk, zulh awk a kan pek hmasa lengmang mi a um. Cu hna zong cu amah he naih tein um longah kan theih khawh i, zei kan rel lo ah cun zei aw hmanh kan thei kho ve lai lo i, khi ka ah a ti nak hmun zong kan thei lai lo. Cucaah, nihin ah khi ka ah ti mi hmun hi kan theih fiang i kan va panh asiah cun, khuaruah har Pathian sunparnak kan hmuh lai i a thluachuahnak phuntling he a kan um pi nak hmun cu asi lai.
Pathian lung ton nak, Khrih chung i him nak khi ka ah cun panh cio hna uh sih!
Dr. Hniang Uk
Manila, Philippines
///////////////////////////
read more "Khi ka ah"

Pathian he naih le hlat


Jeim 4:8 Pathian cu naih u law an naih ve hna lai

Immanence                  = Pathian cu kan pong ah naih tein a kan um pi nak
Transcendence            = Pathian cu kan sinin aa hlat tuk nak in a kan zoh nak

Pathian cu van le vawlei ser tu a si i khoika poah ah a um mi si. Pathian he naih le hlat kan ti tikah hin lenglei i hlat le naih kha si lo in, Pathian thinlung chung in, kan thinlung chungin naih le hlat tu kha a sawh duh deuh mi asi lai.
ZTC, Falam ah siangin ka kai lio ah, nikhat cu class chungah saya. Dr. Do Sian Thang nih blank paper cheu li ah cheu khat cio khi a kan phawt i, Immanence le Transcendence ti mi hi tial uh a kan ti. Ca tlap ka zoh tikah a faate long si fawn, ka tial duh mi le tam ngai, Immanence long ka tial hmanh ah a khat cang. A hnu lei he a hmai lei he khat dih lak in ka tial. Grade point 1.75 long ka ngah. Ka hawi pa Zawzaw (Zaw Lat Aung) cu
Immanence                  = daily bread
Transcendence            = over drinking
ti mi te long hi a tial i full mark bak a ngah. A idea um tu ning cu, immanence nih hin Pathian nih kan sinah naihtein a kan um pi i, kan i fenhaih awk, kan ei din awk vial te zong a kan zoh khenh, a kan um pi, a kan tuarpi, a kan lawmhpi, a kan hnemh i a kan hruai ti kha theih i Pathian ttihzah bu tein nun kha asi. Ka hawipa nih transcendence hi over drinking tiin a langhter tikah, Pathian cu ka pong ah um loh, hlat tuk nak in a um, ka duh poh in ka um lai, ka ding lai ti kha asi. Pathian kan pongah mithmuh in um sehlaw kan tuah ngam lo dingmi thil kha, kan tuah tikah Pathian cu kan pongah a um lo ti kha kan tuah sernak nih a langhter ko. Bawi le kan saya te hmai ah kan duh paoh kan tuah ngam lo, kan um ngam lo.
Nihin ah ka chim duh mi cu, Pathian nih Thlarau Thianghlim in a kan um pi peng ko ti hi cu hopoah nih kan chim dih mi asi ko lai nain, kan tuahser nak nih hin Pathian cu kan sinah a um lo bantukin, hlat pi ah a um ban tukin le kan tuah mi thil hi a kan hmu kho deuh lai lo bantukin kan um sual mi tu kha asi. Khrihfa nun hi theih le chimh thiam kha asi lo, nunpi tu kha asi. Sermon hna thiam tuk, chimh le rel hna thiam tuk ttung i a nunpi huam lo mi nihin ah tampi hmuh asi. Zeibantukin Pathian nih a ka umpi ko kan ti len kan chim len zongah ningcang loin kan nun, kan ei, kan ding, mi kan hleng hna asiah cun, cu kan tuahsernak nih cun Pathian nih a umpi lo mi, Pathian he aa hlat tuk mi kan si ti kha a langhter ko. Pathian cu naih uh law an naih ve hna lai tiah a kan cawnpiak bantukin, Pathian he naih tein um hi kan mah cungah aahngatchan (a mutti) hmasa mi asi, khrihfa nun ahcun kanmah nih va naihhmasa le va tlaihchan hmasa le va bochan hmasa a herh mi si. Cuticun, Pathian nih tawin a kan lak dih ve lai. Pathian nih thluachuah in pe cio ko hna seh!
Dr. Hniang Uk
Manila, Philippines
read more "Pathian he naih le hlat"

A sannak phanh hnu thlacam




Mark 6:46 A zultu kha a kalter dih hna hnuah anih cu thlacam awkah tlang cungah a kai

Teinak kan hmuh tikah, onnak kan hmuh tikah, minthannak kan hmuh tikah, hla hna kan remh, sermon hna crusade hna camping hna kan tuah dih tikah, thil pipa kan tuah dih tikah khoi ka ah kan kal ton? Minih thangthat awkah an ra lai, lawmhnak bia chimawkah an ra lai, zei thinlung dah kan ngei cang? Lawmhnak bia a chim tu ding hna kha a bawh in kan bawh sual hna maw? hihi, sualnak ah a kan luhpi kho tu an si, kan i ralring ngaingai a hau. A sang pi kan phan cang kan ti lio ah, a kan tlak ter tu le tlak fawi taktak mi si. Hi ban tuk tukforhnak  hi a hopaoh nih kan ton lengmang mi thil a si.

Mark 6:46 i a cung lei kan zoh ah cun, Jesuh nih nga pahnih le chang panga in minung thongnga rawl a danghnak kong asi. Thil lianngan a tuah dih hnu bak asi. Zeitindah a si khawh tiin zultu hna he pakhat le pakhat i ceihnak, discuss tuahnak can hmanh a pe hna lo. A dih bak in a zultu hna kha lawng chungah a luhter hna, cun Bethsaida lei a kal ter cawlh chung hna i, anih tu cu thlacam awkah tlang cungah a kai. Jesuh nih amah nawl in a tuah mi zeihmanh a um lo. A Pa thawng longlong in a tuah mi si i APa kha thangthatnak le sunparnak a pek hmasa peng. Cutikah Satan tukforhnak zong a tei dih peng. Jesuh hmanh thla a cam lengmang asi ahcun kan nih teh zeitluk in dah thlacam kan herh chinchin lai ti hi kan ruat bal maw!

Voikhat ah, kan khua (tlang hram lei) ah crusade an tuah i, adonghnak zanlei sang ah, saya pakhat nih a piang thar mi nan kut thlir uh, a ti. Cun, milu a rel hna i, khah, cuzat thlarau tlau ka tlaih hna tiah list a lak i khrihfa upa pawl a pek ta hna. Program dang ka ngei rih a ti i a kan tlun tak. Khua ka ruat ngaingai mi cu, Thlarau tlau mi tlaih khawhnak hi minung tuah khawh mi si hnga maw? David nih milu a rel ban tuk asi i, mah pumpak thangthat duhnak thinlung a chuak cang tikah Pathian a lang kho ti lo, kan i ralrin awk a herh ngaingai. Cucaah, thluachuah kan hmuh ding tluk in kan hmu ton lo lengmang nak cu asi. Jesuh nih a kan hmuhsak mi lamtu hi zulh khawh i zuam hna uh sih.
Cucaah, Pathian thawngin khuaruahhar in thil kan tuah khawh mi, teinak kan hmuh mi hna a um tikah arannak in Pathian sinah kal i kanmah te longin caan lak in thlacam hi a herh ngaingai. Cutikah Satan pa zong nih kan nun ah hmunhma a la kho ti lai lo. Kan nih unau rawl kan dih lak hihi i ralring cio hna uh sih, Pathian longlong kha panh lengmang ko uh sih, zeitik hmanhah philh hlah uh sih. A mah longlong sunparnak kan pek peng a siahcun a ra lai mi thlichia le tilet zong kan tei dih ko lai.

Nan cungah Pathian thluachuahnak um ko seh!
Dr. Hniang Uk
Manila, Philippines
//////////////////////////
read more "A sannak phanh hnu thlacam"

Pathian Thawng longlong in a si ko


Rom. 11:36 zeizong vialte hi amah nih a sermi an si i…. amah thawngin…. amah caah an si dih. Pathian cungah sunparnak cu zungzal in um ko seh! Amen.


Hmasabikah Pathian min cu thangthat in um ko seh! Nihin hi zarhtin thlarau rawl tiah ka rak thlahnak kumkhat tlinnak ni asi. Pathian min ka thangthat tuk! Sermon a rel tontu nan dih lak cungah Pathian nih thluachuah in pe chinchin hram ko hnaseh. Kumkhat chung pehtonh tein thlah khawhnak caantha a ka pe tu Pathian min thangthat loin ka um kho lo. Paul nih a chim bang in, zeizong vialte hi amah thawngin, a mahcaah le amah sunparnak caah ah an si dih a ti bangin Pathian nih sunparnak co chinchin ko seh!


Zarhtin Thlarau Rawl tiin kumkhat chung ka thlah lai tiah ka hawipa ka sawm i thlacamnak ka tinpiah lio ah, ka hawipa nih cun, sianginn na kai lio ah na ca he, asi kho lo, na duh cun thlakhat voikhat hrawng thlah te ko a ka ti i hna a ka tlak pi lo. Nihin ahcun Pathian thawngin kumkhat a tling cang. A karlak tete ah khual zong ka tlawngpah ton nain asikhawh chungin pehtonh tein thlah khawh ka rak i zuam peng. Ka room in internet a ngah lo can hna zongah ka hawi le room in asi khawh chungin thlah khawh dingin kaa zuam peng. Ka rian pakhat ah ka rak ruah i, ka ministry pakhat ah ka rak ruah. Cucaah, thla rak ka cam piak peng ve uh ti kha nan dih lak sinah sawm le nawl kan duh hna. Voikhat cu ka hawi Chinese pa he Luzon (Philippines ram chung) lei ah khual kan tlawng i kan riahnak ah internet um ti lo, sundayzing le asi cang. Sermon thlah ka hauh cang nak kong kha ka hawipa cu ka chim i a rannak in a motor he internet umnak lei ah kan va tli colh. Hi hna hi keimah nih ka tuah khawh mi si lo, Pathian nih khua a khan dih mi tu kha asi. Minung nih kan tuah khawh, kan ti khawh kan ti mi hi a rak si hrimhrim lo. Jesuh nih Johan 15:5 chungah, keimah loin nan tuah khawh mi zeihmanh a um lo ati bantukin, zeizongvialte hi Amah thawng longlongin asi ko.


Cucaah, Pathian sinah duhnak taktak he kan i timh asi ahcun, Amah nih zeizong vialte tlam a tlin ter dih ko lai. Pathian nih a zoh mi cu thil dang si lo, kan thinlung Amah caah si maw, kan pek maw, ti mi longlong kha asi. Pathian he ahman mi thlarau lei i pehtlaihnak ngeih ding tluk in a herh mi vawlei cungah zeihmanh a um lo. Cu nun cu ahopaoh ngei hna seh ti a kan duh. Asinan, kan minung sinak, derthawmnak nih a kan tei lengmang i keimah ka ti khawh, ka tuah khawh, ka kawl khawh, ka thiam, ka sang kan i ti sual lengmang. Cu tikah, kan tla than lengmang.


Cucaah, Paul nih a kan cawnpiak mi, zeizong vial te hi Pathian thawng longlong in asi ko ti mi hi kan nun ah i tlaih peng uh sih law, Amah tu kha sunparnak pe lengmang ko uh sih tiah sermon tawite kumkhat tlin nak lawmhnak bia chim bu he thazang lak pah ding in kan sawm hna.

Sermon rel ton tu, thla a ka cam piak tu nan dih lak sinah lawmhnak tampi ka ngei, Pathian nih thluachuah in pe chinchin ko hna seh!


Dr. Hniang Uk

Manila, Philippines

//////////////////////////////

read more "Pathian Thawng longlong in a si ko"